الأعمال الكاملة ديوان(٢) ضحكة فوق وش الضَّي

٤٢ ..أحمد ومينا 

أنت أحمد ولَّا مينا .. هِيَّا تفرق عندى إيه؟!

كلنا راكبين سفينة.... وحلمنا باصِّين عليه

لمَّا واحد يبكي فينا ....كلنا بنمسح عينأنت أحمد ولَّا مينا .. هِيَّا تفرق عندى إيه؟!

..

مش بيفرق عندي اسمك .. ولَّا دينَك إيه يكون

مش بيفرق عندي رسمك .. ولَّا شكلَك أى لون 

كلنا من جنس أدم ..أصلنا صلصال وطين

أنت مصرى زيِّ زيَّك ..نبقى ليه متفرقين؟!

كنت غربي أو جنوبي ..أو صعيدي سيناوي نوبي 

خير بلدنا دِي علينا ....نفس توبك هُوَّا توبي

أنت أحمد ولَّا مينا .. هِيَّا تفرق عندى إيه؟!

..

ليه بتكره ليه تجافي؟! .. ربِّنا النُّور والسَّلام 

لو نعيش الحُب صافي .. تنمحني كل الألام 

الحياة فيها اختلاف .. والبشر متنوَّعين

بالتَّسامح وائتلاف .. نلقى نور الله معين

قلبك أنت يكون عليَّا .. وحضني ليك مليان عمار

بين إيديك وبين إيديَّا .. تطلع الشَّمس بنهار

أنت أحمد ولٍّا مينا ... هِيَّا تفرق عندي إيه؟!

..

ف الكتيبة وجُوًّا جيشنا ....... بالهدف متوحدين

شعب واحد طول ما عيشنا ..... ضد فكر الحاقدين

ليه ف الكون مش قابل غيرَك ؟!

عايز تعيش فيه وحدك بَس؟!

مش كلُّه هايسير على سيرَك 

ليه بس الأشواك تتمَس؟!

خلُّو الحُب سلام يجمعنا ...... نلقى بدور ونَّاسة تهل

نزرع لحن أمان ف المغنى .. يطرح لينا ثمار مع ضل

ليه بننسى الإنسانيَّة ؟! .. أب آدم حَوَّا أم 

لمَّا تصفى الرُّوح ونيَّة .. قلب يحضن إيد تضم

أنت أحمد ولَّا مينا .. هِيَّا تفرق عندى إيه؟!

..

بُص شوف أجراس ومدنة .. بالسَّلام تهتف تنادي

الصَّليب وهلال ف إيدنا ..هى دِي أوصاف بلادي

شوف كنيسة جنب جامع ..حضن واحد ف الحيطان 

مصر نورها بحُب لامع ..ف البيوت وف الغيطان

اسألوا نقش الزَّمان .. واللي ناسي فكَّروه

دا الوطن حضن الأمان ... ليه يا ناس بتعكَّروه؟!

انت أحمد ولَّا مينا .. هِيًّا تفرق عندي إيه ؟!

كلنا راكبين سفينة .. وحلمنا باصِّين عليه

لمَّا واحد يبكي فينا ...كلنا بنمسح عينيهيه