عيد العمال : للشاعر راضى على الطهطاوى

 الأعمال الكاملة ديوان(٩) فنجان القهوة اللي بيضحك 
٤٢٣... عرق الجبين
تحيَّة للمكن اللي داير ... واللي دم عزيمته فاير 
واللي ف المصنع بيعرق ... يغزل الإنتاج ستاير 
مصر رايحة تبقى جنَّة ... لمَّا نصبح مخلصين
..
تحيَّة للشخص اللي باني .. واللي عمره ما كان أناني 
بالسَّواعد جه وعمَّر ... ولَّا فلَّاح وشُّه سمَّر
زارع اللقمة بإيده ... كلِّنا نفرح بعيده
دا الكسل يهدم يدمَّر ... والعمل زينة الجبين
...
مصر بجهود الولاد
تبني قصر المجد تاج .... تلقى زرع الخير نتاج
لمَّا نعرق كل ثانية ف الدقيقة ... حلمنا يصبح حقيقة
لمَّا مصرى صوته ينده .. تعرف الدُّنيا دا مين 
....
ف البرودة والحرارة .. ناس بتصنع ف الحضارة
بالمهارة والجدارة .... نبقى بالتأكيد صدارة
نلقى خيرنا بين إيدينا .... حلمنا يصبح يقين
...
ناس تخضَّر ف الرِّمال ... واللى بيشق الجبال
واللي بيعلم رجال 
والمصانع والورادي ... واللى بيهندس في وادي
تسلم الهمَّة وأيادى .... والوشوش العرقانين
...
دا العرق سر الحياة ... يصنع مهابة ويبني مجد
دا العمل فرض وعبادة ... حصن ضد الفقر سد
ألف بوسه فوق جبينكم ... ألف شكر كمان بجد
ولَّا ست عشان بلادها ... بالكفاح تصنع ولادها
واللي حامي يا ناس حدودنا ...والعيون السَّهرانين
مصر رايحة تبقى جنَّة .... لمَّا نصبح مخلصين
.....