يوم الوداع لـ الدكتورة ياسمين
بما ان مسيرى فى يوم راح اموت
وراح أمشى واسيبكوا وانا مبسوط
فأمانه يجد ومن قلبى بلاش تنسونى
وانا فى القبر هناك محطوط
بلاش الدنيا تاخدكم منى
وتنسيكوا ان انا محتاجكم
والأيام تبعدكم عنى
وانا فى القبر هعوز دعوتكم
انا عارف ان انا لما امشى
عادى الناس هتعيش بعديا
والدنيا تعدى وراح تمشى
وتعدوا ايام ما تفكروا فيا
عيد هتروحوا تزوروا وتدعولى
والعيد التانى هتنسونى
وهيجي العيد اللى ينسيكوا
ملامح وشى وفى عنيا
بس انا امى أكيد ما هتنسى
ولا هتعيش فى ليالى هنيه
ولا هيزةرها الفرح ويجى
ولا هتنام الليل بعديا
وانا لو هيجينى
فى قبرى النور
فبسبب امى ودعاها ليا
انا عارف ان ابويا هيحزن
ويعيش ايام قاسيه وعنديه
ويعيش ايام فى جراح ومرار
وينام لياليه بيفكر فيا
بس آدى حال الدنيا يا أبويا
كله هيمشى وهيفارق
والمتفارق بكره يفارق
اللى بيكذب واللى يعاند
بكره يشوفوا الدنيا التانيه
وانا مش خايف ولا متضايق
انى مسيرى فى يوم راح أفارق
علشان انا ليا أصحاب اشكال والوان
وليا حبيبه حبيتها زمان
فأكيد فاكرينى وراح يدعوا
انى فى قبرى اكون فى امان
انا لما هموت هتموت أحلامى
ومستقبل كان مرسوم قدامى
بدراسه وشغل وسفريه
وكام بيت لولادى وعربيه
وفلوس فى بنوك ملهاش اعداد
وحلاوة روح هتغيب وتروح
ما الخير فى الروح مش فى الأجساد
كل المطلوب من دلوقتى
تفتكروا الخير مش غلطه زمان
لانى زمان كنت صغير
ما أعرفش الخير م الاطمئنان
ما اعرفش ان الغلطه تودى النار
وان كان على ذنبى وأخطائى
فأنا دلوقتى كتير ندمان
فأغفرلى يارب وكون جنبى
سخرلى جنود م الأرض بتدعى
ولسان دايما يذكر غيبتى
بالحسنى وبخير كلام
سخرلى جنود م الأرض بتدعى
وملايكه تردد بآمين
انى كتابى يكون فى يمينى
وانى اروح جنة رحمن
