الحب مش دباديب

الحب مش دباديب ...ولا حضن في السَّراديب

الحُب فيه تضحيَّة ...والفرح فيه أعاجيب

مش دمع يحلالي

قالوا فيه للحب عيد ....وشموع يا ناس بتقيد 

دباديب في كل مكان .. حمرا الورود ف الإيد 

قولت أنا طاب مالي 

م الحُب إيه نابني؟!....حبيبي راح سابني

أسهر أعد نجوم ....خدنى الهوى وما جبني 

و لا حد شاف حالي

م الحُب خدنا إيه ؟! ....وبنِتعِب قلوبنا ليه

عطينا ولا قدًّروا .... القلب قسيوا عليه 

وفراق شغل بالي

مين للهوى يستاهل ؟!....كلُّه بهواك يتساهل 

كلُّه ف هواه كداب ...ياما باعوك بالسَّاهل

ودفَعْت التَّمن غالي

فين راح تلاقى حبيب ...يصفى هواه ما يغيب

الحب كلُّه وجع .....الحب فيه ألاعيب

موج البحار عالي

ياما عشقنا ودوبنا .. تعبت معانا قلوبنا

واحنا كفاية كدا ...من ذنب الهوى توبنا

مهما في يوم جالي

الحب شوق وآلام ..لهفة وعتاب وملام 

لمَّا الحبيب يهجرك ...تسهر عيون ما تنام

والفكر مش خالي

الخب كلُّه جنان ..وياما حبيب اتهان

حافظين قانون الهوى ...في يوم حبيب لو خان

تفرح كتير عذَّالي 

الحب مش دباديب ..ولا حضن في السَّراديب

الحُب فيه تضحيَّة ..والفرح فيه أعاجيب

مش دمع يحلالي

...