البنزين المغشوش يحرق جيوب المصريين إزاى تحمى نفسك من فخ طرمبة البنزين بعد انتشار الغش!

فى الأيام اللى فاتت زاد الزحام بشكل غير طبيعى قدّام مراكز الصيانة وخصوصًا فى مناطق زى القاهرة والجيزة والإسكندرية. السبب؟

 خلل مفاجئ فى طرمبة البنزين عند مئات – بل آلاف – من أصحاب العربيات وسط شكاوى متزايدة إن البنزين من بعض المحطات غير مطابق للمواصفات ومغشوش!

الميكانيكية بيأكدوا إن العطل متكرر جدًا ومش طبيعي، وكل المؤشرات بتشير إن السبب الرئيسى هو نوعية البنزين مش مجرد استهلاك طبيعى أو عمر افتراضى للطرمبةوده فتح الباب لأسئلة كتير عن دور الرقابة وهل الجهات المعنية زى حماية المستهلك وهيئة البترول متابعين اللى بيحصل فعلاً؟

طيب تعمل إيه علشان تحافظ على طرمبة البنزين؟

1- ابعد عن المحطات المشبوهة: اختار دايمًا محطات موثوقة ومعروفة حتى لو السعر أعلى شوية. غلطة بنزين مغشوش هتكلفك آلاف الجنيهات فى تغيير طرمبة أو حتى البخاخات.

2- متستناش لغاية ما البنزين يفضى خالص: الطرمبة بتتأثر لما تسحب رواسب من قاع التانك. حاول دايمًا تعبي قبل ما المؤشر ينزل للربع.

3- راقب صوت العربية: لو حسيت إن صوت الطرمبة عالى أو السحب بقى ضعيف دى علامة إن فيه مشكلة جاية.

4- الصيانة الدورية مهمة: فلتر البنزين محتاج يتغير بانتظام لأنه بيمنع الرواسب من إنها توصل للطرمبة.

المشكلة مالهاش كلفة بس.. ليها تمن اقتصادي كبير!

اللي بيحصل مش بس صداع لأصحاب العربيات لكنه كمان نزيف فى الاقتصاد القومى. طرمبات البنزين وبخاخات الوقود دى مكونات بنستوردها بالدولار ومع الغش المنتشر ده الاستهلاك زاد بشكل هستيرى وده معناه ضغط أكتر على فاتورة الاستيراد!

النتيجة؟

 استنزاف للعملة الصعبة وارتفاع أسعار قطع الغيار وكمان تأثير غير مباشر على التضخم في سوق الصيانة وقطع الغيار طيب الكرة دلوقتى فى ملعب مين؟ والناس بتسأل هل جهاز حماية المستهلك هيتدخل ويفتح تحقيق؟ هل الهيئة العامة للبترول عندها رقابة دورية على المحطات؟ ولا إحنا قدام ملف مفتوح على مصراعيه للغش التجارى بدون رقابة حقيقية؟

أيمن بحر بقولك: طرمبة البنزين مش مجرد قطعة.. دى ترمومتر بيقيس مصداقية السوق ومدى احترامه للى بيدفع من جيبه ومن أعصابه كل يوم!